گالری موسیقی آذربایجان

منیم سئودیییم تورکولر

+ آیریلیق

فرهاد و آیرێلێق ماهنێ‌سێ

 (این ماهنی را با صدای چند خواننده مشهور دانلود کنید)

جاوید تبریزلی

Ququş گوگوش
آیریلیقAyrılıq

یعقوب ظروفچی

گونئل

 ظوروفچو-گوگوش
آیریلیقAyrılıqYouTube

 دانلود ترانه ایریلیق سامی یوسف 

 رجب ابراهیمی (ر.الف.فرهاد) آذربایجانین تانێنمێش شاعیری‌دیر. اوْ 1314-نجی ایلین آبان آیێ‌نێن 15-نده اردبیلین یۆرتچی ماحالێ‌نین «کوْرابازلێ» کندیدنده آنادان اوْلۇب، 10 یاشێندا ایکه‌ن عایله‌سی ایله بیرلیکده تئهرانا کؤچمۆشله‌ر.

فرهاد تئهراندا یاشارکن، اوْ دؤورۆن قێزغێن ایجتیماعی مۆباریزه‌سی‌نین جانلێ شاهێدێ اوْلاراق عئینی حالدا ریضاشاه رئژیمی‌نین قالێق‌لارێ‌نێن آذربایجانلێ‌لارێن میللی وارلێغێنێ لاغا قوْیانلارێن چیرکین عمل‌لری اوْندا وطن و ائل محبّتینی  داها گۆج‌لندیریر و بو جۆر یاراماز آدام‌لارێن سیماسینی، پیس نییت‌لی، بد عمل‌لی آدام‌لارێ یازدێغێ طنز شئعرلری ایله گۆلۆش آتشینه تۇتۇر.

فرهادین اوْ دؤور مۆهۆم فعالییت‌لریندن بیری ده مرحوم بسته‌کاریمیز اوستاد علی سلیمی ایله ایران رادیوسوندا لیش‌بیرلییی آپارماسێ‌دێر. اوْ ساده دیلده ماهنێلار یازێر و اوستاد سلیمی ایسه اوْنلارا آهنگ بسته‌له‌ییر و رادیوْدان یایێلێر. فرهادێن اۆره‌یینده‌ن قوْپان سئوگی نغمه‌لی «آیرێلێق» ماهنێ‌سێ دیل‌لر ازبری‌دیر. اوْ ماهنێ‌نێن، ماراقلێ یارانما و یایێلما تاریخی وار. فرهاد سئوگی نغمه‌سی قوْشۇر، اوستاد علی سلیمی بسته‌سینی یازێر وارتوش خانێم اوْنۇ اوْخۇیۇر، ایرانا سفر ائده‌ن آذربایجانێن دونیا شؤهرتلی مۆغنّی‌سی رشید بئهبودوْو ماهنێ‌نێ بیه‌نیر و اوْنۇ اؤزۆ ایله اوْتایا آپارێر. ایکینجی دؤنه قایێدارکن آیرێلێق ماهنێ‌سێ رشید بئهبودوْوون ایفاسێندا اؤلمه‌ز بیر خالق نغمه‌سی کیمی سسله‌نیر. و ایل‌لر بوْیۇدۇر کی، بۇ ماهنێ دیل‌لردن دۆشمۆر. اوْنۇ بیر چوْخ مۆغنّی‌لر ده دؤنه-دؤنه ایفا ائدیر.

فرهاد، اینقیلاب‌دان قاباق اؤز دوْغما یۇردونا سوْنسۇز محبتّی سایه‌سینده، آتا-بابا کندلرینده (کوْزابالێ) مۆعاصیر اۆسلوبدا بینا تیکدیریر . ائله‌جه ده کند آبادانلێق ایش‌لرینده یاخێندان ایشتیراک ائدیر. اوْنۇن رهبرلییی ایله کنده آسفالت یوْلۇ، ائلئکتیریک ایشێق، مۆعاصیر اۆصولو ایله لۆله‌کئش‌لیک، مدرسه‌لر و ... ایشلر باش تۇتور. ...

فرهاد اینقیلاب‌دان سوْنرا یارانان آذربایجان شاعیرلر و یازێچێ‌لار جمعییتی‌نین ایداره هئییتی‌نین عۆضوۆ کیمی دیلیمیزین، ادبییاتێمێزێن اوْغرۇندا یوْرۇلمادان چالێشێر. «گۆنش» مجله‌سی‌نین یایێلماسێندا چوْخلۇ امک صرف ائدیر. آرزو ائدیریک کی فرهادێن یارتدێغێ اثرلرده اوْنۇن ایجرایی ایش‌لری کیمی ایشیق اۆزۆ گؤرسۆن. اوْنا اۇزۇن عؤمۆر و یارادێجێ‌لێق حیات آرزولایێرێق.

آیرێلێق ماهنێ‌سێ

 

گئجه‌لر فیکریندن یاتا بیلمــیره‌م

بۇ فیکری باشێمدان آتا بیلمیره‌م

نئینه‌ییم کی سنه چاتا بیلمیره‌م

آیرێلێق - آیرێلێق آمـــان آیرێلێق

هر بیر دردن اوْلار یامـان آیرێلێق

 

اۇزۇندور هیجریندن قارا گئجه‌لر

بیلمیره‌م من گئدیم هارا گئجه‌لر

وۇروبــــدور قلبیمه یارا گئجه‌لـر

آیرێلێق - آیرێلێق آمـــان آیرێلێق

هر بیر دردن اولار یامـــان آیرێلێق

 

منبع: آذری فصلنامه‌سی، شماره 6- صص 122-123

بو دا شئعرین آردی:

 

یادیما دوشنده آلا گوزلرین

گویده اولدوزلاردان آلام خبرین

نئیله ییم کسیبدیر مندن نظرین

                                آیریلیق، آیریلیق ، آمان آیریلیق

                                   هر بیر دردن اولار یامان آیریلیق

آیریلیق دردینی چکمه ین بیلمز

یاردان آیری دوشن گوز یاشین سیلمز

دئییرلر اینتظار خسته سی اولمز

                              آیریلیق، آیریلیق ، آمان آیریلیق

                           هر بیر دردن اولار یامان آیریلیق

نئجه کی ائلیمدن آیری دوشندن

سورار بیربیرینی گوروب بیلندن

حسرتله سیزلار یار داییم بو غمدن

                              آیریلیق، آیریلیق ، آمان آیریلیق

                             هر بیر دردن اولار یامان آیریلیق

ایل لردی اوزاقام آرخام ائلیم دن

بلبلم دوشموشم آیری گولوم دن

جور ایله آییریب شیرین دلیم دن

                                  آیریلیق، آیریلیق ، آمان آیریلیق

                              هر بیر دردن اولار یامان آیریلیق

اوولوبدور بیگانه یاریم_ یولداشیم

غریبه ساییلیر سئوگیم – سیرداشیم

بوجاوان چاقیمدا آغاردیب باشیم

                                آیریلیق، آیریلیق ، آمان آیریلیق

                            هر بیر دردن اولار یامان آیریلیق

منی آغلاداندان گولوش ایسته رم

آیری دوشنیمله گوروش ایسته رم

حصاری ییخماقا یوروش ایسته رم

                              آیریلیق، آیریلیق ، آمان آیریلیق

                             هر بیر دردن اولار یامان آیریلیق

سئوگیلیک اولوبدور شانی فرهادین

سئوگی سی هاردادیر ،هانی فرهادین

دییه ره ک چیخاجاق جانی فرهادین

                             آیریلیق، آیریلیق ، آمان آیریلیق

                           هر بیر دردن اولار یامان آیریلیق

نویسنده : ماحمیت سینماز ; ساعت ۱:۳٦ ‎ب.ظ ; ۱۳۸۸/٥/۱٠